Першы абласны лінгвістычны конкурс “Ведай родную мову”
4 сакавіка 2017 года на базе ДУА “Гімназія №56 г.Гомеля” адбыўся першы абласны конкурс “Ведай родную мову”, прысвечаны 135-годдзю з дня нараджэння класікаў беларускай літаратуры Я.Купалы і Я.Коласа.
Конкурс арганізаваны па ініцыятыве ўпраўлення адукацыі Гомельскага абласнога выканаўчага камітэта.
Навукова-метадычнае суправаджэнне конкурсу “Ведай родную мову” забяспечылі ДУА "Гомельскі абласны інстытут развіцця адукацыі”, ДУА “Гімназія №56 г.Гомеля”.
Конкурс праводзіўся ў мэтах развіцця цікавасці да вывучэння беларускай мовы; выяўлення здольных, лінгвістычна адораных дзяцей; развіцця інтэлектуальнага патэнцыялу навучэнцаў, раскрыцця здольнасцей вучняў у галіне мовазнаўства.
Адной з галоўных задач конкурсу з’яўлялася праверка ўзроўню лінгвістычнай падрыхтоўкі вучняў, якія ўвайшлі ў зборную каманду вобласці, да заключнага этапу рэспубліканскай алімпіяды па вучэбных прадметах “Беларуская мова” і “Беларуская літаратура”.
Інтэлектуальнае спаборніцтва ўключала два туры: лінгвістычны конкурс і конкурс водгукаў на мастацкі твор.
У конкурсе прынялі ўдзел 79 вучняў Гомельскай вобласці, з іх 27 вучняў IХ класаў, 27 - Х і 25 вучняў ХI класаў.
Конкурсныя работы ацэньвала журы з настаўнікаў, якія падрыхтавалі пераможцаў III этапу рэспубліканскай алімпіяды па вучэбных прадметах “Беларуская мова” і “Беларуская літаратура”.
Па выніках работы 35 юных знаўцаў беларускай мовы і літаратуры ўзнагароджаны дыпломамі. З іх дыпломы I ступені атрымалі 6 вучняў, II ступені – 12, III ступені – 17.
Жадаем поспехаў нашай камандзе на заключным этапе рэспубліканскай алімпіяды па вучэбных прадметах “Беларуская мова” і “Беларуская літаратура”!
